>>每一個年代，也有他們的青春片。
這套應是8090後們的乾淨青春片。
不要以為悶片。
都是年青人明白的世界。
其實這批人也很乖。
不是醉酒又濫交。
算了罷，那一個年代的年青人沒試過。
片中就是想大家明白現在的年青人，他們都是很簡單的人。
他們沒有甚麼宏大想法，只想快快樂樂地過每一天。
很簡單又直接。
故事中有各種搞鬼做法。
也沒甚大不了。
起碼不是打家刧舍。
也沒有在眾人面前吸毒。
有的，都只是一眾大人的其中一種做法。
算了，大人們用了解角度就足夠了。
他們已好乖了，雖然幾層樓高掟同學落樓，只為了解決即時問題。
真的現實，因善良的他們是這樣思考嘛~
>>如令我印象最深，應是中國人的男主角叫jack cheng。
雖然好似姓陳，但我一再睇是cheng。
點都好，你問我關唔關成龍的影響力，我一定話有。
在外國人眼中，中國人都是打得玩得，就算3樓被人掟落街，都唔死得。^^
《21成人鳥》21 & OVER
主演： 《心靈觸動》 米爾斯泰勒 Miles Teller
《胡士托風波》 施佳拿艾斯汀 Skylar Astin
《吸血新世紀》系列搞笑韓男 積斯汀‧曹Justin Chon
《伴娘先生》索爆女星 莎拉活麗 Sarah Wight
導演及編劇： 《醉爆伴郎團》鍾魯卡斯 Jon Lucas and 史葛摩亞 Scott Moore
監製︰ 《擊情手足》David Hoberman、Todd Lieberman、
Ryan Kavanaugh
香港上映日期： 2013年5月23日
級別︰ 待定
片長︰ 待定
電影簡介
荷里活瘋狂賣座喜劇《醉爆伴郎團》系列原創班底編劇2人組鍾魯卡斯(Jon Lucas)同史葛摩亞(Scott Moore)，絞盡「21年」腦汁，親自編劇兼首次執導，炮製咗《21成人鳥》(21 & Over)呢部爆笑“Over”之作！
話說高材生份人一直好規矩，點知佢兩名老死喺佢21歲生日，俾咗個surprise之後，佢就變得反常，連21歲生日之後第二朝個醫科學院面試都唔去！本來話一杯啤酒就拜拜返屋企瞓覺準備，究竟發生咗咩事咁“Over”？
故事大綱
高 中時friend到爆嘅張傑 (Justin Chon 飾)、卡斯 (施佳拿艾斯汀 飾)同米拿(米爾斯泰勒 飾)三人，自從升讀唔同大學，少見多掛。適逢張傑 21歲生日，喺美國可以合法飲酒，卡斯、米拿突擊殺到佢喺西雅圖嘅大學，同佢行個「酒吧成人禮」。問題係張傑個醫生老竇，為咗個仔嘅前途，竟然安排咗醫學 院面試喺第二朝8點！
本來張傑諗住只係飲一杯，12點就返歸。但一個唔覺愈飲愈high，三兄弟連掃多間酒吧，又影相又騎馬，卡斯更出力喪媾張傑 個索爆女同學妮歌(莎拉活麗 飾)，懶理張傑已飲到斷片！距離面試嘅時限逐秒倒數，人生路不熟兼唔知個friend住邊嘅卡斯同米拿，為咗帶張傑返屋企，先後要應付隔籬大學欖球隊嘅吉 祥物火爆大水牛，同妮歌個大隻佬男友，佢哋分分鐘過唔到今晚，今次真係唔慌唔“Over”！
《醉爆伴郎團》1+2原創編劇班底 秘製搶手爆笑劇本
話 說憑「蝙蝠俠」部拳擊片《擊情手足》(The Fighter) 攞過奧斯卡最佳電影提名嘅名監製David Hoberman同Todd Lieberman，之前仲做過《求婚的惡魔》(The Proposal)等超級賣座喜劇，不過講到堅揪，又點夠全球史上最賣座R級(即等同香港III級)笑片《醉爆伴郎團》犀利！
兩集先後搶走全球4 億6千萬同接近6億美金票房，加埋有成10億近80億港紙！鍾魯卡斯(Jon Lucas)、史葛摩亞(Scott Moore)寫完兩部《醉爆伴郎團》之後，又忽發奇想，想寫出一部講成長嘅爆笑無聊瘋狂笑片劇本，亦即是《21成人鳥》，劇本更是未有片廠支持下創作嘅 spec script，可見有幾忠於創作人自己，而且入面嘅題材肯定「膽色過人」。監製講起阿鍾同史葛呢兩個short short地嘅荷里活搶手編劇，笑笑口話：「我哋不嬲都想同佢兩個合作！佢哋啲幽默感勁到冇朋友，因為啲劇本夠冇腦，啱晒我呢類人！」
故 事好簡單，三個老友仔一齊慶祝其中一個21歲生日，但點知飲多兩杯，成晚就開始失控，咦？咪即係《醉爆伴郎團》？哦！原來唔單止咁，同《醉爆伴郎團》異曲 同工嘅，係《21成人鳥》將會更深入發問一個關於友情嘅問題，就係──究竟友誼係咩？究竟同你最friend嘅朋友，你同佢真係有connection， 定還是其實只係咁啱呢幾個人，就喺附近住或者一齊返學做嘢，所以你先至會成日同佢去街呢？但當然，《21成人鳥》嘅重點都係引爆瘋狂同低俗笑料！同《醉爆 伴郎團》其中一個最大分別，除咗主角年齡，今次故事入邊嘅情節就比較「入世」，大部份情景都同你我息息相關，簡單講即係有共鳴好多！
21歲生日搞出事 源自編導FANTASY加音樂節奇聞
呢 對「爆笑“Over”編劇二人組」更大爆，《21成人鳥》並非二人嘅「個人自傳」，反而係佢哋兩個長久以來，一直渴望想要做嘅事，亦即是後生仔嘅 fantasy阿鍾說：「大部份史葛同我寫嘅，都係個人主觀願望居多，我印象中自己嘅21歲生日係無咁甩掣嘅，雖然我嗰日真係唔知搞咗啲乜出嚟，但當然比 唔上我哋故事入個幾個主角咁爆啦，哈哈哈哈！」
講起《醉爆伴郎團》嘅成功，阿鍾就話：「好多人鍾意《醉爆伴郎團》，我哋都真係衷心感激呢部電影， 不過我諗出面嘅觀眾對《醉爆伴郎團》嘅愛，同我哋作為原創人嘅愛，始終都係唔同嘅！我哋鍾意《醉爆伴郎團》夠『寫實』呀！呢部係由劇情帶動嘅笑片，唔同其 他一般靠idea堆砌嘅喜劇！今次《21成人鳥》亦都係一樣，都係『解謎喜劇』(mystery-comedy)，喜劇入面有懸疑片元素，未到最後觀眾都 未知事態發展，非常過癮。其實自古而來成功嘅喜劇，大部份都有故事同人物，唔係齋笑料呀。」拍檔史葛就補充：「我同阿鍾都鍾意有大眾共鳴嘅電影，我哋有張 列表，寫起幾件一般人都曾經經歷過嘅嘢，再從中寫出搞笑瘋狂情節。好似話大家都曾經試過宿醉hangover啦，另一樣就係變成21歲嘞！20變21只係 一個過程，我哋將變成21歲，融合埋阿鍾一次去音樂節嘅經歷，就寫咗《21成人鳥》出嚟嘞。」
阿鍾諗番轉頭，猶有餘悸咁話：「嗰次喺沙漠參加 《Coachella》音樂節，真係熱到跳舞，我friend女友個家姐途中唔係好舒服，啲飛咁貴唔通走咩，咪唯有一路陪住佢家姐囉！之後，再串連起中學 時候，可能曾經扶過你老友返屋企嘅感覺，點樣心力交碎咁五十磅秤五十磅返到佢屋企，諗吓諗吓，成個idea就出咗嚟嘞。」
喺編導阿鍾心 目中，16、17歲生日同樣會大事慶祝，因為喺美國居住，代表你終於可以駕車，但21歲生日就係另一件更大嘅事，基本上人人都會搞生日，而且心情亦異常興 奮。而且，之後22歲、30歲甚至40歲，則愈嚟愈唔想慶祝，因為開始覺得自己老嘞……所以，21歲生日真係好緊要呀！阿鍾話：「21歲生日，係會約全世 界同你慶祝的，戲中我哋叫『美國酒吧成人禮(American Bar Mitzvah)』，因為呢日開始就美國法例嚟講你至正式係成人，你終於可以做任何一切你之前唔可以做嘅事，例如第一次行入酒吧，至少你終於唔使再靠大話 走入去，你唔使犯法，你終於受呢間酒吧歡迎嘞！」
壽星喪飲醉爆 8AM前要護送返歸 怪事OVER & OVER
戲 中，三位主角本來冇見一排，啱啱想重新認識對方，但對方已經改變咗唔少，例如米拿開始認知到對自己同身邊人要有責任，卡斯為咗進入金融行業，要俾心機喺成 績方面追上去，張傑則因為跟住老竇「有樣學樣」而惹嚟周身蟻，每個人都有自己嘅經歷同過程，不過到最後大家都明白到友誼嘅可貴！
故事開場無耐，就 係兩位好朋友，走去21歲生日嗰個friend間學校搵佢，問題係生日嗰個飲醉之後，佢兩個唔記得咗個friend住邊，結果當晚嘅下半場節目，就係四周 圍搵friend住邊，但更大嘅問題係，如果返唔切屋企，佢個friend個老竇唔會放過個仔，因為第二日就係醫學院嘅面試！過程間，遇上好多怪事同阻 滯……
戲情最引人入勝嘅就係，生日嘅張傑醉爆之後，佢兩個老友四周圍咁向曾經出現過嘅人刮料，過程中就喺度不停咁搵出 「究竟我哋個friend係個點嘅人？究竟佢做過啲乜嘢？佢有冇咩問題？」所以張傑幾乎一路無醒過，但劇本就不斷喺度搵出呢個角色究竟係點！有咩人同佢係 有關係嘅！十足十緝兇片入面個警探，用兩個鐘頭去調查未曾出現過嘅連環殺人狂一樣！
技術X搞笑2人組處男執導 成荷里活新1代喜劇鬼才
除 咗《醉爆伴郎團》，阿鍾同史葛已經寫過多部在荷里活大受歡迎的喜劇，例如《我們的大鑊假期》同《死鬼女友搵上門》，但今次《21成人鳥》，佢哋終於唔單止 包辦劇本，而且更得到監製信任，俾佢哋處男執導！扮演主角米拿嘅米爾斯泰勒(Miles Teller)，更話完全睇唔出導演係第一次執導，因為佢哋喺片場識得控制氣氛，又令演員可以盡情發揮喜劇細胞，雖然幾位主角都算後生，但大家夾得非常過 癮，睇起嚟根本同一班20、21歲嘅好朋友絕無分別！
千祈唔好睇小呢部《21成人鳥》，事關編導兩位喺拍攝前，竟然細心到設計定分鏡表同故事畫板，仲專登問定老行尊意見，身邊嘅大導演、大監製等都無一倖免，要俾評分同意見！
作為《21成人鳥》嘅靈魂重心，阿鍾同史葛呢對好拍檔兼，可以話係互補不足，史葛比較大膽但亦有分析頭腦，個性係「老正」嗰隻，對故事結構亦都敏感，而阿鍾就比較多搞笑諗頭，性格funny好玩，2合1可以話係如虎添翼，難怪荷里活中人都對《21成人鳥》寄予厚望。
雖 然事前準備充足，但阿鍾同史葛去到拍攝地點，亦唔會死板地跟住劇本，一字一句照拍，就算每一頁劇本已經寫得細緻，他們都可以即場再作提升，真係好強！講起 拍檔，比較正經嘅史葛就話：「同阿鍾拍戲就好似同個老友去街咁，我哋嘅執導方法係分工，一個同服裝傾時，另一個就搵攝影指導、搵景、化妝等等，其實都幾隨 意。」阿鍾亦都話，《21成人鳥》只可以由兩個人同時執導，缺一不可，點解？「我只可以做到『半個好導演』呀！一直喺度調校演法，撞出新嘅笑料真係好過 癮，但都要史葛喺另一邊睇住啲技術問題，我其實搞唔清分場嗰啲架！所以一係就用晒我哋兩個，一係就拆散我哋，搞到兩邊都冇得撈啦！」
阿鍾形容，其 實佢同史葛根本都無諗過做導演，只係咁啱《21成人鳥》呢個劇本，係出於佢哋手。「我哋見過太多勁嘅導演，劇本一去佢哋手就拍得到，而我哋兩個其實完全錯 晒，我哋根本就係懵丙，《21成人鳥》根本係一個教我哋做導演嘅『瘋狂補習社』，去到片場，個個都走嚟問你呢樣問你嗰樣，問題係導演嘅工作就係回答大家問 題，你要答呀！」
話雖如此啦，其實講到尾佢兩個都好鬼like《21成人鳥》呢部成品。阿鍾答話：「做編劇要sell人用你個gag，但做導演就只係需要叫人用呢樣做嗰 樣，有權力去談判同爭取好多嘢，又多啲自主，但如果部戲出到嚟爛，你就難辭其咎要負上責任。做導演比較攰，都係做編劇舒服啲！」
演員及編導介紹
《渾身是勁》舞系型男
米爾斯泰勒 (MILES TELLER) 飾演 米拿
原 定被安排為卡斯一角試鏡，但認定一定要做米拿，終在試鏡贏得角色。荷里活最當時得令上位男星之一，現居洛杉磯，處男拍戲已遇著金像影后妮歌潔曼 (Nicole Kidman)，與她合演舞台劇改編作《心靈觸洞》(Rabbit Hole)。賓夕凡尼亞州Downingtown市出生，早年熱愛運動，費城人隊(Phillies)同老鷹隊(Eagles)超級粉絲，12歲移居佛羅 里達州，日日打棒球。因為「劇社條女幾省鏡」，同朋友走去《渾身是勁》(Footloose)面試，最後雙雙獲得演出機會。高中畢業後考入紐約大學，再演 《渾身是勁》內Willard一角，但今次是2011年的荷里活電影版！其後演過北美賣座電影《Project X》，現正分別同金像提名安娜姬妲妮(Anna Kendrick)、莎蓮活德麗(Shailene Woodley)、碩克艾弗朗(Zac Efron)合拍新戲。
《TWILIGHT》搞笑韓男
JUSTIN CHON飾演 張傑
韓 裔美國人，《吸血新世紀》(Twilight)系列諧星，憑Bella同學仔Eric Yorkie廣為全球認識，仲做過夏里遜福(Harrison Ford)電影《越界驅逐令》(Crossing Over)等。南加州出生，父母係南韓移民，老竇係電視藝員，媽咪係鋼琴家，嗜好有滑浪、踩滑板、網球、哥爾夫球，又識彈結他、彈鋼琴、拉小提琴同吹色士 風。
李安《胡士托》搞手
施佳拿艾斯汀 (SKYLAR ASTIN) 飾演 卡斯
紐 約人，同安娜姬妲妮(Anna Kendrick)、伊莉莎伯班絲(Elizabeth Banks)合拍電影《辣妹合唱團》(Pitch Perfect)，又唱又演，成功走紅，亦曾為迪士尼卡通《無敵破壞王》(Wreck-It Ralph)獻聲。重要演出還有在李安作品《胡士托風波》(Taking Woodstock)扮演胡士托創辦人，仲拍過辛丹斯參展喜劇《Hamlet 2》、客串過《醫神》(House)、《Girls》、《Love Bites》等劇集，亦曾替東尼獎得獎劇場踏台板。
《伴娘先生》索爆人妻
莎拉活麗 (SARAH WRIGHT) 飾演 妮歌
美 國肯塔基州路易維爾市(Louisville)出生，早年在劇團演戲，14歲做嫩模，1999年在模特兒大賽被正式發掘。去年同《異種2011》奀星男友 Eric Christian Olsen結婚，現與兩名子女居於洛杉磯。拍過《伴娘先生》(Made of Honor)，曾與安娜花莉絲(Anna Faris)、愛瑪史東(Emma Stone)合演笑片《The House Bunny》，分別與馬修麥康納希(Matthew McConaughey)、卻羅素(Kurt Russell)合演新片，亦會演出狄美摩亞(Demi Moore)導演處女作《Streak》，亦客串過劇集《廣告狂人》(Mad Men)等。
編劇‧導演
鍾魯卡斯(JON LUCAS) + 史葛摩亞(SCOTT MOORE)
荷 里活金牌搞笑編劇。1999年替《妙探出差》(Beverly Hills Cop)金像提名編劇Daniel Petrie Jr.創作時認識，自此合作無間，憑全球大收近10億美元瘋狂賣座喜劇《醉爆伴郎團》系列的第一集，獲美國編劇公會、英國電影學院(BAFTA)最佳原創 劇本提名，《醉》片二部曲先後成為影史上最賣座的R級別(等同香港III級)的喜劇，二人名利雙收，在《21成人鳥》首次執導。創作還包括雲斯韋漢 (Vince Vaughn)與影后莉絲韋絲潘(Reese Witherspoon)合演的《我們的大鑊假期》(Four Christmases)、馬修麥康納希和珍妮花嘉納(Jennifer Garner)主演的《死鬼女友搵上門》(Ghosts Of Girlfriends Past)，以及賴恩雷諾士(Ryan Reynolds)、積遜比曼(Jason Bateman)合演的《死黨兜亂檔》(The Change-Up)等。
沒有留言:
張貼留言